Ik zat saam’s met mien vrouw in de auto van Roalte noar Groningen toen d’r een vrachtwaang ging bumperkleven. Ik reed 84, dus te hard, mar vrachtwaangs riedt teengswoardig bienoa neengtig. Het ging de chauffeur achter mie te langzaam.
Ik ben d’r van oavertuugd det de meeste ongelukken geböart wegens bumperkleven én ik ben niet graag de earsten in een kettingbotsing, dus ik leut het gaspedaal löss töt wie zestig reden. Wat de chauffeur achter mie noar zien scheepshoorn deed griepen. Andere middelen had e niet, want bumperkleven deed e al.
Toen ik wear 84 reed sleut de vrachtwaang wear an töt an mien bumper. “Ik vind det poging töt moard”, zei ik teeng mien vrouw en terwijl ik mien snelheid wear minderen verzwakken ik de strafeis wat of noar poging töt doodslag.
Mien vrouw vund det ik die chauffeur achter mie niet zo mosse pesten, Terwijl ik van tachtig noar zestig noar veartig ginge, le’ng ik uut det het wat mie betreft zelfbescherming was.
Toen die moardlustige chauffeur achter mie de bumperofstand an’epast had van een meter noar een halve meter voeren ik de snelheid wear op. Ik zat zo op tachtig, hij niet.
Het belang van ofstand bleek een kilometer verderop. Een koppel koeien vleug vanuut een weiland, oaver de sloot döar de berm de weg op. Ik mos keihard op de remme. De vrachtwaang achter mie had ruumte zat te anticipearen. De chauffeur dör’m mie niet via de spiegel an te kieken, beschaamd keek e wat links en rechts.
Ik zuuk noar een internationaal signaal öm bumperklevers an te gee’m det ze te kort op riedt. Ik denk an ien kear links en ien kear rechts het knipperlicht an en dan het gevoarenlicht een paar kear d’r achteran. Iemand een better idee?
Het bericht Denne wil een bumperkleefsignaal introduceren. Heb jij een idee? verscheen eerst op Opinie in Salland.
…
Het hele artikel is te lezen op www.Salland1.nl
Het bericht Denne wil een bumperkleefsignaal introduceren. Heb jij een idee? verscheen eerst op Salland TV.