Ik reed van de wekke achter een grieze vrachtwagen die ok in het wit te leaveren bleek. Det hadden wichter d’r op ‘eschreem, en det schrie’m ging heel makkelijk: met een vinger de roet van het dieselroet wegpoetsen.
Denne van Knöldert
Vrogger deud ik det ok wel ‘ns. ‘Ik ben vies’ of ‘ik wil gewassen worden’ schree’m wie dan achter op een vieze auto en dan renn’ wie heel hard weg. Doar mos de baas dan met an de slag. Teengwoardig goa ie döar een wasstroate, mar die waren d’r toen nog niet.
Ie ziet ok wel ‘ns wat grotere projecten, woarbie bevobbeld treinen en geluudschermen beschilderd wördt. Ik vreug mie lest of hoe die graffitikunstenaars – want doar hebbe wie het oaver – soms op plekken komt woar ik dan van denke det det of gevoarlijk is of det iederiene oe met gemak kan ziene. Die vroag kwam op toen ik langs de nieuwe geluidschermen langs de N35 bie Zwolle reed. Doar mut iemand oaverhen ‘e klumm weane en zich zelf met een touw op vier meter hoogte of hemm’ loaten dalen.
“Zo giet det precies”, wus een deskundige mie te vertellen, toen ik det onderwerp ansneed an de koffie in het Holstohuus in Olst. Doar keek ik uut op een steens mure en ik vreug mie hardop of of doar mooie graffitikunst niet op zien plaatse zol weane. Bleek een toafel verder een deskundige te zitten. Hij stellen zich vöar en was enthousiast oaver het idee.
Intussen vertellen e ok oaver noodladders, abseil-touwen, capuchons en vöaral ok heel snel werken woarbie de iene de kaders uutzetten en de ander de kleuren invullen.
Hij was zelf praktiserend.
Dus as straks die kale steens mure an de parkearplaatse van het Holstohuus mooi beschilderd is, ken in de dader. Mar ik goa hem niet verklappen. Ik moedig hem hooguut an öm ok de silo’s van Booijink in het centrum van Roalte op te fleuren.
Het bericht Denne bedenkt graffiti bie het Holstohuus verscheen eerst op Opinie in Salland.
…
Het hele artikel is te lezen op www.Salland1.nl
Het bericht Denne bedenkt graffiti bie het Holstohuus verscheen eerst op Salland TV.